Contrat entre l’Hôpital de Strasbourg et l'Œuvre Notre-Dame concernant une maison située en face de la cathédrale, construite par Heinrich Wehelin le Lonherr, et pour laquelle il doit donner annuellement 16 deniers à l'hôpital.

Wir Niclawes von Kagenecke der meistere und der rât von Strazburg tůnt kunt allen den die disen brief gesehent oder gehoͤrent, das her Heinrich Wehelin der lonherre und meister Êrwin der wercmeistere vur sich und vur ir nachkummen mit heren Niclawese von Kagenecke mit heren Johanne ins Kalbesgassen und mit heren Johanne von Sarburg, unseres spiltals pflegeren ze Strazburg, sint uberein kummen, daz iemerme swer in deme huse deme nehisten deme muͤnstere, das her Wehelin gebuwen het, gesessen ist, der sol geben deme spittal ze Strazburg iergelichs sehzehen unce Strazburgere genge und gebere pfenninge. wand oͧch emals die nehiste hovestat den spittal anchôrte und mit des selben huses enweg ze lihenne noch mit deme erschatze, son het der spittal nihtz niht ze schaffene. daz diz wâr si und stête blibe, derumbe sint unser stette und heren Wehelins ingesigele an disen brief gehenket zeime urkunde. dis geschach an sante Gallen tage, da von gots geburte warent tusent iar zweihundert iar und vieri und ahzig iar. herane warent here Johannes Panfile, here Lucas, here Reinboldelin und here Niclawes von Kagenecke die vier meistere und der rât von Strazburg.